Мэгатур-2015 стартаваў! «Рознастылёвы» топ-12 ад рэдакцыі Tuzin.fm

На Tuzin.fm распачалося галасаваньне ў самым важным туры сэзону. Апошняя 12-ка найлепшых песень, якія атрымалі права пазмагацца за званьне галоўнага гіту — ад рэдакцыі нашага парталу.

«Няма таго, што раньш было», — гэтую фразу часта даводзіцца чуць у дачыненьні да чарту на «Тузіне». Слухачы згадваюць часіны, калі ў нас за 1-е месца змагаліся Zet, IQ48 і UltraВожык і кажуць, што цяпер такіх гітоў як «Белакрылы анёл», «Выйсьце» і «Атлянтыда» ўжо не зьяўляецца. Між тым, у тыя часы, на якія спасылаюцца цяпер, было прынята згадваць ранейшыя часы — трохі вальнейшыя для музыкаў, калі N.R.M. і «Новае Неба» выступалі ў парку Горкага, а Neuro Dubel ачольваў гіт-парад кліпаў на БТ. У тыя гады таксама згадвалі з настальгіяй пра ранейшыя часы… Гэта нармальна — азірацца назад і згадваць найлепшае. Самае яркае і важнае найлепей бачна якраз на адлегласьці. Між тым, працэс ідзе. І ўжо 12-ы сэзон па ліку мы маем з чаго выбіраць, і выбар гэты зрабіць няпроста, бо годных і вартых беларускамоўных песень зьяўляецца ўсё болей. Прычым у розных стылях, што асабліва радуе.

З рознастылёвасьці мы і сыходзілі ў фармаваньні «рэдакцыйнага» рэйтынгу.

Fridance — Дым

Як толькі на «Тузіне» была прэзэнтавана гэтая кампазыцыя, рэдактар адной зь менскіх FM-станцыяў папрасіў неадкладна даслаць яму гэты трэк у максымальнай якасьці, каб паставіць у ратацыю. Алесь Кот-Зайцаў у ідэале меўся бы жыць за роялці, бо ён піша такія песьні, якія хочацца слухаць, пераслухоўваць і дзяліцца імі зь іншымі. І ўсе яны вартыя актыўных ратацыяў. 

Brutto — Наша возьме і Trubetskoy — Горад

Новыя песьні праектаў удзельнікаў «Ляпіса Трубяцкога» ўдзельнічалі зь пераменным посьпехам у сёлетнім галасаваньні на «Тузіне». Канечне, калі яны былі разам, то атрымлівалася значна лепей, але імкненьне выявіцца паасобку мы таксама вітаем. Тым больш, што і ў адным, і ў другім выпадку атрымаліся някепскія песьні. Паэзія Якуба Коласа выдатна ўпісалася ў канцэпцыю Brutto і надрыўны голас тайбаксэра Гуркова дадаў новы сэнс — яна стала патрыятычнай і спартовай крычалкай. Дэбют Булатнікава, як беларускамоўнага паэта-песеньніка таксама атрымаўся досыць удалым — пэўна «Горад» ня будзе галоўным гітом «Трубяцкіх», але ўвагі заслугоўвае безумоўна.

Віталь Варанко — Вяртайся

Пра такія творы кажуць — ідэальна складзены. Верш Віталя Рыжкова цудоўна паклаўся на харызму Віталя Варанка, а саўндпрадусару Ўладу Яруну засталося гэты момант належным чынам зафіксаваць.

Vuraj — Вэлытай, пэрэпылко

Ужо даўным-даўно ў беларускім фольку не зьяўлялася песьні, засьпяванай і пададзенай так, што хочацца яе паставіць на рэпіт. Палеская песьня «Вэлытай, пэрэпылко» ў выкананьні Сяргея Доўгушава з гуртом «Вурай» мае ўсе шанцы стаць беларускай «We Will Rock You», — пісалі мы, калі твор быў прэзэнтаваны на «Тузіне». За гэты час гэтая думка зацьвердзілася. Схадзіце на канцэрт каманды і напоўніцу адчуйце ўсю магію гэтага сьпеву.

Intelligency — Восень

Арыгінальны ангельскамоўны гурт зь Менску, які сумяшчае ў сваёй творчасьці тэхна і блюз, наважыўся на беларускамоўны экспэрымэнт. І выйшла абсалютна выдатна. Будзе проста злачынствам, калі хлопцы не працягнуць далей.

Pauline — Палон

Выдатны прыклад таго, якой можа быць сапраўдная беларуская поп-музыка — у Паўліны атрымліваецца ўсё прыўкрасна на ўзроўні вакальнай падачы, паэзіі, аранжыроўкі. Варта выходзіць на шырокі абсяг, за такімі людзьмі будучыня нашай музыкі.

SP Kava — яМы

Чароўны і магічны беларускі рэп, зроблены на найвышэйшым узроўні. SP Kava яўна знайшоў сябе, сваю канцэпцыю і свой гук. Засталося толькі знайсьці публіку. Жадаем выканаўцу вялікіх сольных канцэртаў — і паболей!

.К — Малады М.

Самы дзіўны трэк з усіх удзельнікаў нашага чарту, які проста немагчыма абмінуць увагаю.

Tanin Jazz — Каханьне

Таня Гарошка робіць абсалютна цудоўную і пазытыўную музыку. Цяпер яшчэ і па-беларуску. Шкада, што ў яе не атрымалася рэалізаваць задуму з выданьнем цалкам беларускамоўнай праграмы, але ёсьць спадзеў, што гэта яшчэ адбудзецца. Пакуль жа маем выдатны танцавальны трэк «Каханьне», які цяпер выконваецца Таніным праектам Take The Cookies.

Павал Аракелян — Дай мне шанец     

Аўтарскі беларускамоўны дэбют Паўла выйшаў надзвычай удалым. Аракелян бярэ голасам, харызмаю і татальнай любоўю да сваёй справы.

Андрэй Макарэвіч — Сьнег

Дагэтуль цяжка паверыць, што гэта здарылася. Перамовы з Макарэвічам пачаліся яшчэ ў час працы над «Перазагрузкай-2», але зьдзейсьнілася задума толькі сёлета. Гэта песьня-падзея. Песьня-цуд. Песьня, ад якой бярэ гонар за беларусаў і за тых расейцаў, якія лічаць сябе эўрапейцамі.

Усе згаданыя песьні ў экспэртных 12-ках возьмуць удзел у мэгатуры-2015. Усе рэйтынгі можна паглядзець па тэгу мэгатур-2015. У выніковых турах відэа і альбомаў возьмуць удзел усе ўдзельнікі чартаў.

Пасьля стартавага пэрыяду, штодня ў кожным з чартаў мэгатуру будзе здымацца апошняя кампазыцыя, пакуль іх не застаецца 12. У выніковых турах галасы абнуляцца і будзе ісьці галасаваньне да апошняга, з дапамогай якога вызначыцца Песьня, Кліп і Альбом гэтага сэзону на Tuzin.fm.

Tuzin.fm