Ян Маўзэр: «Будзь са мной злой» (прэм’ера!)

Новы праект Янкі Маўзэра «МАМА» прадстаўляе на Tuzin.fm сьвежы трэк «Будзь злой», які возьме ўдзел у апошнім туры ў музычным сэзоне 2014—2015.

Колішні лідэр гурта Mauzer прадставіў свой праект «МАМА» год таму песьняй «Вам!», якая цяпер уваходзіць у тройку самых запатрабаваных беларускіх гітоў на Tuzin.fm за ўвесь час. З таго моманту новы гурт Яна Маўзэра перад публікаю так і не зьявіўся, затое плённа працаваў у студыі. Адзін зь сьвежых трэкаў музыкі прадстаўляюць у 16-м туры аўдыёчарту.

«Гэтая песьня была напісаная ў 2012 годзе ў Кіеве. Я не прыхільнік тлумачэньня сэнсу сваіх твораў на словах, зьнікае фішка ў такім разе. Песьня для мяне — гэта спроба па-іншаму паглядзець на зразумелыя рэчы, таму лічу, што слухачу будзе цікава разгадаць код, а ня проста ўзяць у рукі ўжо сабраны кубік-рубік, нібы школьную хрэстаматыю пачытаўшы», — кажа Ян пра кампазыцыю «Будзь злой» і прадстаўляе людзей, зь якімі ён працуе ў межах праекту і якія вызначаюць яго гучаньне.

«Перш за ўсё — гэта гітарыст Сяргей Нікалайчанка. Чалавек, які граў трэш у 80-я, папсу з Анжалікай Агурбаш і „Віртуальнымі тэхналёгіямі“ ў 90-я й нулявыя, а цяпер грае са мной. Чаму я бясконца рады. Басістам у нас Уладзімер Развадоўскі. Мультыінструмэнталіст і разумны пазытыўны чалавек, які дакладна адчувае, што й як трэба сыграць. Акрамя нас, грае таксама на клявішах у „Без билета“. І нягледзячы на свой зусім малады ўзрост, пасьпеў ужо пабыць удзельнікам Yellow Brick Road, ансамбля Ларысы Грабалёвай. Бубнач — Арцём Крышчановіч. Таксама мультыінструмэнталіст — гітара, скрыпка, фартэпіяна, містэр інтэлігентнасьць і спакой. Да „Мамы“ граў у „Тэзаўрус“ і „Скімэн“. Нарэшце, запіс, зьвядзеньне, майстраваньне, клавішы — Уладзімер „Kolxz“ Селядцоў — колішні гітарыст Mauzer — мой верны баявы таварыш. Чалавек складаны, тонкі й глыбока таленавіты».

ПРЭЗЭНТАЦЫЯ ПЕСЬНІ НА КАНАЛЕ TUZIN. STREAMING_BELARUS НА SOUNDCLOUD

Пакуль музыкі вызначаюць свой стан, як «набіраньне моцы». У працы ў іх знаходзіцца яшчэ некалькі трэкаў і яны ўжо гатовы прадставіць праект ужывую. Выступ гурта «МАМА» ў Менску плянуецца на восень-2015.

МАМА — Будзь злой (музыка Яна Маўзэра і Сяргея Нікалайчанкі, словы Яна Маўзэра). Зьмяшчаецца са згоды выканаўцы.

Tuzin.fm

Будзь злой

Будзь са мной злой, калі ласка,

Каб высахла імя твайго мора,

Каб памяць не разрывала на часткі

І не душыла гальштукам чорным.

Сябар, ты мне паняшчасьціў,

Замкні на ключ свае дзьверы,

У нас з табой няма часу — 

Твой цень забудуць шпалеры.

Будзь са мной злой, калі ласка,

Бо падушка яшчэ табой пахне,

Бо агульная зубная паста

Яшчэ на палічцы ў ванным.

Будзь са мной злой, калі ласка,

Бо адзін я ў чужым горадзе.

Будзь, каб я ня быў плаксам,

Каб трымаў сваё сэрца ў холадзе.