Відэа пра Менск, каханьне і мэтафарычную вайну

У першым туры відэа-чарту на «Тузіне Гітоў» бярэ ўдзел кліп на песьню «Ні кроку назад», якую выконвае Vinsent. Яна стала саўндтрэкам да фільму «Вышэй за неба». Выканаўца апявае Менск , каханьне і сваеасаблівую мэтафарычную вайну.

Відэа на песьню «Ні кроку назад» здымалі ў старой закінутай школе ў Менску. Шчыравала над ім здымачная група, якая была задзейнічана ў фільме «Вышэй за неба» – апэратары Аляксей Карнееў і Арцём Якімаў, мастак-пастаноўшчык Кірыла Блахін і рэжысэр Андрэй Курэйчык. Сам трэк стаў саўндтрэкам да гэтай стужкі, дзе зьняўся і сам выканаўца. Вінсэнт кажа, што прапанова зьняць кліп сыходзіла ад стваральнікаў «Вышэй за неба», якія моцна ўпадабалі гэты трэк.

«Гэта песьня пра Менск, каханьне і сваеасаблівую мэтафарычную вайну. Па характары песьня прызыўная. Трэк нарастае, як ком, і выбухае напрыканцы», - так апісвае свой твор выканаўца.

Вінсэнт працягнуў сваю кінакар’еру і зьняўся ў стужцы «Жыве Беларусь», дзе таксама выканаў некалькі музычных твораў.

 Vinsent – Ні кроку назад (рэжысэр – Андрэй Курэйчык). Зьмяшчаецца са згоды выканаўцы.

Tuzin.fm, фота - Budzma.org