«Тузін» вярнуўся! Наш Маніфэст-2013

Інтэрнэт-партал Tuzin.fm аднаўляе сваю працу ў новым выглядзе і прадстаўляе свой новы сайт з трыма чартамі — песень, відэакліпаў і альбомаў беларускіх выканаўцаў.

Місія інтэрнэт-парталу «Тузін Гітоў» застаецца нязьменнай вось ужо 10 гадоў. На старце праекту 12 кастрычніка 2003 году мы заявілі, што маем намер прапагандаваць музыку, створаную тут, ды ўсяляк заахвочваць да праслухоўваньня беларускіх твораў як мага большую колькасьць людзей. Мяркуючы з таго, што наведвальнасьць сайту расла з кожным месяцам, мы сваю задачу выконвалі досыць пасьпяхова.

Зь цягам часу насьпела патрэба ў тым, каб перарабіць сайт дзеля таго, каб увасобіць новыя ідэі і задумы. На наш вялікі жаль, справа гэта зацягнулася надоўга, што тлумачыцца практычна поўнай адсутнасьцю спэцыялістаў, якія б здолелі ўзяцца за гэтую справу з душою і за адносна невялікую плату, бо «Тузін Гітоў» заўжды быў некамэрцыйным рэсурсам, а ўсе заробленыя зь дзейнасьці парталу сродкі ішлі на яго ж разьвіцьцё. Пашэнціла толькі сёлета, калі да працы над рэдызайнам парталу далучылася арт-студыя Pras.by, чальцы якой ня толькі ўвасобілі задуманае намі, але і прапанавалі шмат чаго самі. 

Такім чынам, Tuzin.fm аднаўляе сваю працу ў поўным аб’ёме. Аднаўляецца песенны чарт, заснаваны яшчэ 10 гадоў таму. Правілы галасаваньня ў ім засталіся тымі ж, толькі што цяпер галасаваць могуць толькі зарэгістраваныя на нашым сайце карыстальнікі, альбо тыя, хто галасуе з свайго акаўнту ў Facebook  альбо «УКантакце». Гэта істотна спросьціць маніторынг галасоў, зробіць галасаваньне максымальна празрыстым і сумленным.  

Пачынае сваю працу таксама гіт-парад відэа, дзе будуць прадстаўлены найноўшыя кліпы нашых выканаўцаў. А таксама чарт альбомаў, дзе кожны зможа паўдзельнічаць у вызначэньні найлепшага альбому году. Патрабаваньне да ўсіх удзельнікаў чартаў застаецца тым жа — мы разглядаем толькі якасныя беларускамоўныя працы.  Акром таго, мы пацьвярджаем сваю прыхільнасьць нормам сучаснага клясычнага правапісу, таму ўсе матэрыялы на сайце будуць друкавацца ў адпаведнасьці зь яго правіламі.

Новыя творы ўдзельнікаў песеннага чарту будуць выкладацца ў раздзеле «Навіны» разам з матэрыяламі  аўтараў Tuzin.fm. Інфармацыю пра новыя відэакліпы можна пабачыць у раздзеле «Раім паглядзець» (ён жа «Відэа»), а рэцэнзіі на рэлізы, якія бяруць удзел у альбомным чарце можна знайсьці ў адпаведным раздзеле — «Рэцэнзіі».

Даведзены таксама да ладу наш звыклы разьдзел — «Афіша», дзе мы будзем паведамляць пра найбліжэйшыя канцэрты блізкіх нам выканаўцаў.  

Акром таго, на сайце зьявілася некалькі новых функцыянальных разьдзелаў. У міні-раздзеле «Галоўнае» (адразу пад шапкай парталу) будуць зьяўляцца спасылкі на найбольш важныя і цікавыя матэрыялы за ўвесь час існаваньня нашага парталу. У стужцы «Жамерыны» («жамерынамі» ў беларускай мове называюць выжымку, тое, што засталося пры адцісканьні, працэжваньні ці высмажваньні) будуць зьмяшчацца «хуткія навіны», сьціслыя апэратыўныя паведамленьні з жыцьця беларускіх незалежных музыкаў. У разьдзеле «Tuzinvideo на Youtube» будуць выводзіцца самыя сьвежыя кліпы, самыя цікавыя відэа ранейшых гадоў, рарытэтныя рэчы і запісы з сэрыі канцэртаў «Тузін. Unplugged» і «Жывы Тузін». У разьдзеле «Раім спампаваць» будуць выводзіцца як новыя трэкі, прадстаўленыя на Tuzin.fm, так і песьні з «залатога фонду» нашага парталу, назьбіраныя за 10 гадоў існаваньня. Унізе таксама цяпер можна праглядзець, што найбольш карысталася попытам на старонках парталу за пэўны час.  

Найбольш працаёмкі і важны новы разьдзел — гэта «Выканаўцы». Кожны гурт (сьпявак, сьпявачка), які ўдзельнічаў у нашых чартах, атрымлівае сваю міні-старонку, на якой будзе зьбірацца ўся інфармацыя з усіх разьдзелаў сайту.

Перанос старой базы за 10 гадоў — справа няпростая і вымагае  нямала часу, таму архіў парталу, песеннага чарту ды спэцыяльныя разьдзелы, будуць вернутыя паступова.  

Дзякуй усім, хто верыў і працягвае верыць у нашу справу!

Сяргей Будкін, галоўны рэдактар парталу Tuzin.fm