Чарговы магілёўскі прарыў — Nizkiz напісалі 100% гіт (відэа)

Гурт з Магілёва сыграў сваю першую беларускамоўную песьню «Гуантанама» на канцэрце «УМопомрочение», які ладзіў партал Ultra-Music.com у клюбе Re:Public.

Перад яе выкананьнем вакаліст каманды Саша Ільін папрасіў публіку не судзіць гэты твор занадта сувора. Але як толькі песьня пачала гучаць, стала зразумела, што ў музыкаў атрымалася стварыць яскравы гіт, які можна сьмела ставіць у шэраг іх галоўных баявікоў.  

Засьпяваць на сваёй мове музыкі наважыліся пасьля пяці год дзейнасьці. Каманда стартавала ў 2008 годзе ў Магілёве. Дзякуючы падтрымцы мясцовай філіі «Нашего радио» іх першыя песьні імгненна сталі вядомымі на цэлы горад, а самі музыкі стала выступалі на буйнейшых магілёўскіх фэстах - «Наши в городе», «отНАШЕния», «Третий приход».

Апошнім часам гурт актывізаваўся не на жарт. Яны ўрэшце запісалі і выдалі дэбютны альбом, сталі пераможцамі беларускага адбору адразу на два буйныя замежныя фэсты -  Emergenza і «Соседний мир». Навіна апошніх дзён -  Nizkiz увайшоў у сьпіс лепшых аўтарскіх раздач паводле меркаваньня арт-рады сайта rutracker.org.

Песьню «Гуантанама» Nizkiz вырашылі стварыць напярэдадні іх сумеснага канцэрту з гуртом :B:N:. Як патлумачылі музыкі, іх сьвядомы выбар быў менавіта напісаць цалкам новы твор, а не перакласьці з расейскай ўжо вядомы.

Як паведаміў Tuzin.fm. мэнэджар і бубнач каманды Дзьмітры Халяўкін, зараз музыкі запісваюць «Гуантанама» у студыі. Ужо прапісаныя бубны і бас. Так што аўдыё-прэм’ера адбудзецца ўжо сёлета.   

відэа – Яўген Шапчыц, Tuzin.fm

фота – Аляксандар Ждановіч, budzma.org