Nizkiz. Гімн людзям, здольным на сьмелыя ўчынкі (аўдыё)

У аўдыёчарце на Tuzin.fm стартуе новая беларускамоўная кампазыцыя гурта Nizkiz, якую музыкі прысьвячаюць людзям, здольным на сьмелыя ўчынкі.

«Цяпер і далей» напісаная пад уражаньнем ад удалага беларускамоўнага дэбюту магілёўскага гурта. Іх песьня «Гуантанама» была прынятая на ўра, у тым ліку ў чарце на Tuzin.fm. Кампазыцыя па выніках сэзону 2013/2014 трапіла ў лік 12 галоўных беларускіх гітоў.

«Скажу банальна, але праўду — наша новая песьня пра каханьне. Пра такое няўлоўнае пачуцьцё, калі ты апынаесься на мяжы: яшчэ кахаеш, але ўжо думаеш пра тое, каб сыйсьці, бо разумееш, што будучыні няма. Я называю гэтую песьню гімнам людзям, якія здольныя на сьмелыя ўчынкі і могуць прыняць рашэньне ў складанай сытуацыі», — распавядае вакаліст Nizkiz Аляксандар Ільін.

Музыкі спадзяюцца, што іх песьня паўторыць посьпех іх першага беларускамоўнага сынглу. У іх ужо гатовы новы альбом. Увосень гурт едзе з канцэртамі ў Берасьце, Менск, Віцебск, Рагачоў, Гомель, Наваполацак, а наступны год пачне з канцэртнай прэзэнтацыяй сьвежай плыты. За навінамі Nizkiz можна сачыць празь іх афіцыйную суполку.

Nizkiz — Цяпер і далей (музыка гурта, словы Аляксандра Ільіна і Віталя Рыжкова). Зьмяшчаецца са згоды выканаўцы.

Tuzin.fm, фота з суполкі Euraradio Music

Гайдаецца сьвет у гэтым сьвятле —

не ідэальны, не ідэальны.

Ня ведаю як, тану ў малацэ —

так нерэальна, усе нерэальна.

Ня веру сабе,

ня веру ізноў.

Цяпер і далей —

ня будзе балець.

Я мог уцякаць,

я мог, але як?

Цяпер і далей —

ня будзе балець.

Ідзі і глядзі: на самым краі,

не адрываясь, не адрываясь,

раблю толькі крок і проста лячу.

Так нерэальна мая рэальнасьць.