«Мерада»: «Мы заслужылі перамогу!»

Альбомам месяца на Tuzin.fm стаў дэбютны дыск гурту «Мерада» — «Проста вер».

У 3-м туры галасаваньня ў альбомным чарце праца гурту Ганны і Стыва Крамэраў набрала 221 голас і апярэдзіла ўсіх. Музыкі лічаць гэтую перамогу цалкам заслужанай: «Гэтая праца была запісаная трапятліва і з душою, прафэсійнымі музыкамі. Тэксты нам дапамаглі напісаць выдатныя паэты. І многія нашы сябры і знаёмыя ня толькі зь Беларусі, але і з Украіны, Расеі, Польшчы, Ізраілю і Амэрыкі адзначылі яго суцэльнае, цікавае і не зусім стандартнае для нашай музычнай прасторы гучаньне. Таму мы лічым, што „Проста вер“ заслужана займае месца, якое прысудзілі яму наведнікі парталу», — кажа Стыў Крамэр.

«Проста вер» — гэта 10 кампазыцыяў, вытрыманых у ангельска-амэрыканскай стылістыцы, але перапрацаваных у беларускіх традыцыях. Песьні, што склалі альбом, былі напісаныя задоўга да стварэньня гурту «Мерада» — з 2007 па 2012 год. Для запісу яны былі крытычна пераасэнсаваныя і першаклясна аранжаваныя. У стварэньні альбому ўзялі ўдзел найлепшыя беларускія музыканты, у ліку якіх — басіст Валеры Дасюкевіч (J:морс), клявішнік Іван Кучарэнка (Беларускі дзяржаўны музычны тэатар), бубнач Іван Махновіч (Lipnitsky Show Orchestra), клявішнік Канстанцін Гарачы (Apple Tea), Ігар Варашкевіч («Крама»), які сыграў на губным гармоніку, бубнач Аляксей Золатаў (Svet Boogie Band, Kriwi).

Стыў і Ганна кажа, што зь цікавасьцю назіралі за чартам і самі галасавалі. У прыватнасьці за акустычны альбом гурту BosaeSonca, які вылучаюць за неардынарнасьць музычнага мысьленьня ды прафэсіяналізм у спалучэньні зь велізарным творчым патэнцыялам. Таксама музыкам даспадобы тое, што зрабілі іх калегі зь Беластоку — гурт Ilo&Friends, а таксама «дыназаўры беларускай сцэны» — Зьміцер Вайцюшкевіч з «Камэтай» ды Юры Несьцярэнка са «Сьвятам на дваіх».

«Мерада» даводзіць да ладу свой другі альбом, а паралельна піша ўжо трэці, які будзе акустычным. Да ўсяго музыкі рыхтуюць EP на байкерскую тэматыку ды мантуюць свае наступныя два кліпы. Пачуць ужывую гурт можна на іх канцэрце ў менскім клюбе TNT 11 студзеня.

Tuzin.fm