Памерла заснавальніца беларускай этнамузыкалёгіі Зінаіда Мажэйка

8 сакавіка на 81-м годзе жыцьця пайшла ў іншы сьвет дасьледчыца беларускага фальклёру Зінаіда Мажэйка.

Пра гэта Tuzin.fm паведаміў Вячаслаў Калацэй, загадчык катэдры этналёгіі і фальклёру Беларускага дзяржаўнага ўнівэрсытэту культуры і лідэр гурта «Ветах».

Спадарыня Зінаіда прысьвяціла жыцьцё вывучэньню беларускага фальклёру. Фактычна яе можна лічыць заснавальніцай беларускай этнамузыкалёгіі. Яна скончыла беларускую кансэрваторую і працавала ў Інстытуце мастацтвазнаўства, этнаграфіі і фальклёру НАН Беларусі. Яе працы тычыліся песеннай культуры Беларускага Палесься, Паазер’я, Падняпроўя. Паводле яе сцэнароў на «Беларусьфільме» былі зьнятыя дакумэнтальныя стужкі з выкарыстаньнем унікальнага матэрыялу, сабранага ў экспэдыцыях: «Палескія калядкі» (1972), «Галасы стагодзьдзяў» (1979), «Памяць стагодзьдзяў» (1982), «Крывыя вечары» (1993) і «Рух зямлі» (1999). Спадарыню Мажэйку па-сутнасьці можна лічыць першай беларускай прадусаркай этнічнай музыкі. Яна займалася арганізацыяй канцэртаў фальклёрных калектываў, рыхтавала да выданьня вінілавыя кружэлкі. Плыта «Музычны фальклёр Беларускага Палесься» ў 1988 годзе адзначана Гран-пры ЮНЭСКО.

Відэа: фільм «Палескія калядкі» па сцэнары Зінаіды Мажэйкі і Ўладзімера Караткевіча, рэжысэр Ніна Сава (1972)

Дзейнасьць Зінаіды Мажэйкі паўплывала на айчынную фольк-сцэну. Так, напрыклад, лідэр этна-трыё «Троіца» Іван Кірчук неаднойчы прызнаваўся, што з дапамогай фільмаў дасьледчыцы адкрыў для сябе абсалютна новыя пласты сьпеваў, найперш фальклёр Беларускага Палесься. Вячаслаў Калацэй адзначае, што Мажэйка ня толькі актыўна вывучала каранёвую культуру беларусаў, але і зацята змагалася за яе захаваньне.

Разьвітаньне зь Зінаідай Мажэйкай адбудзецца з 12:00 да 14:00 12 сакавіка ў рытуальнай залі Рэспубліканскага клінічнага цэнтру (Лечкамісіі) па адрасе вул. Чырвонаармейская, 10.

Партал Tuzin.fm выказвае спачуваньні блізкім, родным і калегам Зінаіды Мажэйка.

Tuzin.fm, фота — з суполкі Студэнцкага этнаграфічнага таварыства

На фота: Фальклёрная экспэдыцыя ў в. Зачэпічы Дзятлаўскага раёну. В. Ялатаў, З. Мажэйка, М. Грынблат. 1963 г.

Студэнты кансэрваторыі па дарозе ў фальклёрную экспэдыцыю. У кузаве машыны: кампазытар І. Лучанок, музыказнаўцы А. Саламаха, З. Мажэйка, Г. Камісарава. 1957 г.

У студэнцкіх кансэрваторскіх экспэдыцыях З. Мажэйку накіроўвалі для запісу самых незгаворлівых дзядоў-палешукоў. Экспэдыцыя ў Лоеўскі раён. 1957 г.

На 70-гадовым юбілеі. Песенны дуэт з Іванам Саламевічам, 2003