Як Паліна Рэспубліка зь летам разьвіталася

Сваю новую песьню Паліна Рэспубліка напісала ўвесну, хацела прадставіць улетку, але працу над ёй скончылі ўжо пад восень. Палініна «Лета» удзельнічае ў першым туры аўдыё-чарту на «Тузіне Гітоў».

Паліна кажа, што яе песьню «Лета» было вырашана запісаць «амаль што выпадкова». Кавалачак тэксту з музыкай зьявіўся яшчэ мінулай вясной, а вось астатняе  дапісвалася адмыслова да гэтага запісу. Аранжаваў кампазыцыю Ўладзь Пыльчанка. «Яна пра беларускае лета з усёй любоўю», - прадстаўляе свой твор сьпявачка, якая была прызнаная галоўным адкрыцьцём у беларускай музыцы ў 2011 годзе па вэрсіі Tuzin.fm. Ясна, што прэзэнтацыю твору меркавалася зрабіць на пачатку лета, але праца зацягнулася. Такім чынам, Паліна разьвітваецца ёй зь сёлетнім летам і вітае восень, якая для яе будзе цёплай і фэстывальнай.   

Вынікам працы ў студыі яна засталася задаволенай. Але ці будзе вытрыманы ў падобным музычным рэчышчы будучы дэбютны альбом, сьпявачка адказаць ня можа. «Можа ў такім, а можа і не. Як знойдзем грошы, дык будзе альбом. І на ім самі ўсё пачуеце».

Паліна Рэспубліка атрымала вядомасьць пасьля перамогі на фэстывалі «Бардаўская восень» у 2011 годзе. З таго часу яна лічыцца адной з самых пэрспектыўных сьпявачак на беларускай незалежнай сцэне. Спрабавала свае сілы з рок-гуртом Hasta La Fillsta, але ўжывую выступае ў больш камэрным фармаце.

SB, «Тузін Гітоў», фота – Budzma.org

Паліна Рэспубліка – Лета (музыка і словы аўтара). Зьмяшчаецца са згоды выканаўцы.