Новы Znich: «Малайцы пяюць — на вайну ідуць» (аўдыё)

Гурт Znich прадстаўляе на Tuzin.fm сваю новую песьню «Дунаю», запісаную ў абноўленым складзе для будучага новага альбому. Асноўную вакальную партыю ў ёй выканаў дудар Кастусь Трамбіцкі.

Песьня «Дунаю» — першая, запісаная новым складам гурта Znich. Лідэр каманды Алесь Таболіч тлумачыць, што разышліся з музыкамі з розных прычынаў — нехта цалкам прысьвяціў сябе іншым музычным праектам, а камусьці стала проста абыякава. З Алесем зь мінулага складу застаўся толькі дудар Канстанцін Трамбіцкі. Менавіта яму належыць асноўны вакал у новай кампазыцыі, напісанай паводле народнага сьпеву «Дунаю-Дунаю, чаму ціха йдзеш?». Да гурта далучыліся гітарыст Руслан Ільін з гурта Soulsides, басіст Аляксандар Філіпенка (Folcore), бубнач Сяргей Абрамаў (Imprudence) і клявішніца Марына Макарэвіч («Сонцаварот»).

«Ужо з пэўнасьцю магу сказаць, што прыход новых людзей істотна адбіўся на нашым гучаньні. Зьявіўся новы прафэсійны подых. У абноўленым складзе гурт дакладна не саступае папярэдняму, а можа нават і лепей стаў, як у жывым гучаньні, так і ў запісе, ды і ў музыцы наогул», — кажа Алесь Таболіч.

Пачуць новы Znich можна будзе ў межах іх «Фольк-мэтал туру» па гарадах Беларусі, а таксама на летніх фэстах. Гурт ужо заяўлены ў якасьці хэдлайнэра фэсту «Гонар продкаў», што пройдзе ў Вялейцы 4 ліпеня.

Znich — Дунаю (музыка Аляксандра Філіпенкі, словы народныя). Зьмяшчаецца са згоды выканаўцы.

Tuzin.fm

— Дунаю-Дунаю, чаму ціха йдзеш?

— А як мне, Дунаю, паціху ня йсьці?

На мне, на Дунаю, тры чаўны ідуць,

А ў адным чаўночку конікі ірзуць.

У другім чаўночку малайцы пяюць,

А ў трэцім чаўночку дзяўчаты плачуць.

Конікі ірзуць, бо вайну чуюць,

Малайцы пяюць — на вайну ідуць.

Малайцы пяюць — на вайну ідуць,

Дзяўчаты плачуць, што ў палон бяруць

Дунаю-Дунаю,

На мне, на Дунаю,

Малайцы пяюць

на вайну ідуць,

Малайцы пяюць — на вайну ідуць,

Дзяўчаты плачуць, што ў палон бяруць.