!OUT: Альбом песень-сноў ад Дар’і Кадамскай (+прэм’ера дэбютніку!)

Аўтарка экспэрымэнтальных песень і колішняя пераможца «Бардаўскае восені» Дар’я Кадамская разам са сваім гуртом «Бабэобі» прэзэнтуе на Tuzin.fm дэбютны рэліз «Шапіто».

«Шапіто» — канцэптуальны цыкль з 6 песень-сноў альбо песень-заклёнаў пад агульным назовам. Аўтарка распявала з нагоды прэм’еры на Tuzin.fm, як нараджаўся ейны дэбютнік.

ТГ: Даша, ці лічыце Вы сваё «Шапіто» этапнай працай альбо першай паўнавартаснай? Што гэта, увогуле, — альбом ці міньён?

Гэта мой першы паўнавартасны альбом, запісаны на студыі. Па стандартах атрымаўся міньён, але я да канца сказала, тое што хацела.

ТГ: Колькі часу, грошай, нэрваў пайшло, каб давесьці справу да канца?

Грошай мінімальна. Ідзеш у краму, купляеш ежу, а нешта адкладаеш на запіс. Так што, асабліва гэты запіс мяне не зьбядніў, але расьцягнуўся на паўтара году.

ТГ: Добрых песень у Вас значна больш, чым трапіла ў альбом. Як адбіралі?

Па актуальнасьці. Абрала тыя, што маюць для мяне цяпер сэнс. Напрыклад, мы запісалі песьню «Калі ты прыйдзеш», але я вырашыла не ўключаць яе ў альбом. Бо песьня пра сьмерць, а гэта сумна й няжыцьцесьцьвярджальна.

ТГ: З той жа прычыны Вы так істотна перарабілі адну са сваіх самых першых песень — «Русалчыну»?

Ванітуе ўжо ад яе, але хацелася нарэшце запісаць «Русалчыну» прыгожа. І яна таксама ўсё яшчэ актуальная.

СТУДЫЙНЫ СКЛАД «БАБЭОБІ»:

Дар’я Кадамская — вакал, гітара (1—6);

Варуша Кадамская — рэчытатыў (3);

Аляксандар Ясінскі — баян (1);

Ганна Мацуковіч — скрыпка (5);

Юры Навуменка — кантрабас (3,4), гітара (6);

Дар’я Навуменка — вакал (2);

Юры Данскоў — пэркусія (1—6);

Вольга Сямёнава — віялянчэль (2, 4—6);

Ксенія Шашко — скрыпка (3);

Аляксандар Бабуз — бас-гітара (1, 2);

Віктар Сямашка — флейта (4);

Павал Бачараў — гук, мікс.

ТГ: Якім чынам сабраўся такі шматінструмэнтальны склад «Бабэобі»? Чаму ён адрозьніваецца ад таго, зь якім выступаеце на публіцы?

Да запісу я прыцягнула ўсіх сяброў-музыкаў. Да канцэртовае дзейнасьці, вядома ж, ня ўсе гатовыя. Пад назовам «Бабэобі» мы выступалі нячаста й амаль заўседы розным складам. Па сутнасьці, гэта ня гурт, а проста праект.

ТГ: Назваліся «Бабэобі» ў гонар Хлебнікава?

Я ўжо забылася, як гэтае слова зьявілася ў маім жыцьці… Так, у гонар Хлебнікава ды паклон «Аукцыону».

ТГ: Аранжаваньні рабіліся супольна?

Кожны музыка сваю партыю выдумляў сам. А канчатковы варыянт абмяркоўвалі разам з гукарэжысэрам.

ТГ: Хто аўтар шыкоўнае вокладкі?

Гэта не зусім вокладка. Гэта карціна Іры Забэла, якая падалася мне блізкай. Да стану вокладкі яе даводзілі Максім Кароль і Сьвета Ільіна.

ТГ: Ці будзе жывая прэзэнтацыя «Шапіто»?

Альбом прэзэнтаваць ня буду ні зараз, ні ў найбліжэйшы час, таму што хутка нараджу сына.

ТРЭКЛІСТ «ШАПІТО» З КАМЭНТАРАМІ АЎТАРА:

1. «Гарыць сьвечка».  Песьня пра адраджэньне чалавека да жыцьця.

2. «Купала». Песьня пра сэкс (толькі нікому не кажыце).

3. «Што». Пра маю сям’ю.

4. «Русалчына». Песьня-сон пра каханьне.

5. «Шапіто». Асэнсаваньне ўсяго на сьвеце. Я ўжо сама не разумею, пра што яе напісала. Тут ужытая прамая цытата зь фільму Сяргея Салаўёва

«Чёрная роза — эмблема печали, красная роза — эмблема любви».

6. «Сон-трава». Песьня-сон пра жыцьцёвы шлях чалавека.

Афіцыйная суполка гурта «Бабэобі»

Віктар Сямашка, Tuzin.fm, фотаздымкі прадастаўленыя Дар’яй Кадамскай