Belsat Music Live № 6. Паліна Рэспубліка (+новы анонс)

У новым выданьні аўтарскай праграмы Сяргея Будкіна — Паліна Рэспубліка ў новым фармаце.

Паліна ўжо ў 17 гадоў атрымала гран-пры фэстывалю «Бардаўская восень» і была названая адкрыцьцём году ў беларускай музыцы па вэрсіі Tuzin.fm. На першым сольным канцэрце, які прайшоў у дзень яе паўналецьця, песьні сьпявачкі заля сьпявала хорам. Праз паўгоду Паліна зваявала публіку сваімі мілымі і наіўнымі творамі ва Ўкраіне. Тур па гэтай краіне прыпаў на пачатак Эўрамайдану, але яна не адмяніла свае выступы. Увесь гэты час ад Паліны чакалі дэбютнага альбому. Нарэшце ён выйшаў, але ня выклікаў эўфарыі і катарсісу. Пасьля яго жывой прэзэнтацыі сьпявачка расьпусціла жывы склад ды вырашыла перагледзіць свае адносіны да музыкі.

Празь перапынак у паўтара году Паліна Рэспубліка вяртаецца ў музычную прастору ў новым фармаце. У новым выданьні Belsat Music Live сьпявачка выступае ў зусім новым для сябе фармаце — без гітары і жывога бэнду. У яе выкананьні гучаць як зусім сьвежыя творы, гэтак і вядомыя песьні ў іншых аранжыроўках. У размове зь Міраю Шульц і Сяргеем Будкіным Паліна распавядае пра зьмены ў жыцьці ды творчасьці, разважае пра актуальнасьць сваіх песень, напісаных яшчэ падчас вучобы ў школе, пра расчараваньне ў музыцы і пра вяртаньне на сцэну. А яшчэ падчас этэру сьпявачку чакае сюрпрыз, які для яе падрыхтавалі стваральнікі праграмы.

Песьні, якія гучаць у праграме:

«Калыханка»

(музыка і словы Паліны Паланейчык-Гарадновай)

«Мне ўсьцешна…» 

(музыка Мікаэла Тарывердзіева, словы Марыны Цьвятаевай, пераклад Лявона Баршчэўскага) 

«Вышыня»

(словы і музыка Паліны Паланейчык-Гарадновай)

«Як ты?»

(словы і музыка Паліны Паланейчык-Гарадновай)

Сёмае выданьне Belsat Music Live выйдзе ў этэр у наступную суботу, 18 лютага ў 20:30 на тэлеканале «Белсат». Госьцем будзе гурт Re1ikt.

Tuzin.fm