Дырэкцыя беларускіх клюбаў сфармуе «Мэга-тур» на Tuzin.fm (cьпіс усіх удзельнікаў чартаў)

Па старой-добрай завядзёнцы на Tuzin.fm улетку пройдзе падсумаваньне вынікаў сэзону.

Ад часу заснаваньня нашага парталу ў 2003 годзе «Тузін» кожны сэзон падводзіць вынікі. Кожны раз у гэтай справе дапамагае экспэртная рада, якая абірае з удзельнікаў чарту тыя песьні, якія трапляюць у мэгатур. У розны час гэта былі музычныя журналісты, кіраўнікі беларускіх лэйблаў, музычныя рэдактары айчынных радыёстанцыяў, прадстаўнікі нашых тэлеканалаў і лідэры легендарнай суполкі «Тутэйшыя». У сэзоне 2013/2014 свае дванаццаткі найлепшых складуць кіраўнікі беларускіх клюбаў, у якіх праходзяць канцэрты нашых выканаўцаў. Сёлета ў экспэртную раду ўваходзяць Андрэй Старцаў (Re:Public, Менск), Гарык Аганджанян («Чердачок», Віцебск), Андрэй Лазук («Графіці», Менск), Яўген Агапаў (TNT Rock Club, Менск), Уладзімер Кубышкін (Tarantino, Менск). Да рады далучыцца яшчэ рэдакцыйны голас ад Tuzin.fm. Кожны з прадстаўнікоў рады мае назваць свой «тузін» песень.

Песьні, што будуць згаданыя экспэртамі возьмуць удзел у вялікім выніковым МЭГА-туры. Усе кропкі над «і» раставяць самі наведнікі. Для правядзеньня «МэгаТуру-2014» абраная традыцыйная схема на выбываньне: пасьля невялікага стартавага пэрыяду штодня адміністратарамі гіт-параду будуць здымацца песьні з найменшай колькасьцю пададзеных за іх наведнікамі галасоў. 12-ка найлепшых песень складзе выніковы «залаты» тузін году.

Але і на гэтым гіт-парад ня будзе спынены, пасьля гэтага будзе праведзена галасаваньне «да апошняга», ажно пакуль у чарце не застанецца адна кампазыцыя — уласна Песьня сэзону на «Тузіне». Якая песьня стане галоўнай сёлета, будзе залежыць толькі ад наведнікаў, якія штодня змогуць прымаць удзел у галасаваньні ў звыклай «тузінаўскай» форме.

Паколькі ад гэтага сэзону на Tuzin.fm таксама ёсьць чарт кліпаў і альбомаў, выніковае галасаваньне будзе праведзена і ў іх. У выніковым туры ў гэтых чартах возьмуць удзел усе тыя кліпы (альбомы), якія ўдзельнічалі ў галасаваньні цягам усяго сэзону. Па аналёгіі зь песенным мэгатурам, празь некаторы час той, хто займае апошняе месца, будзе здымацца з галасаваньня да таго моманту, покуль у чарце не застанецца Кліп сэзону і Альбом сэзону.

Сачыце за навінамі і не прапусьціце пачатак самага цікавага і захапляльнага туру гіт-параду на Tuzin.fm! Усе тры супэртуры пачнуцца 7 ліпеня.

Усе ўдзельнікі аўдыёчарту на Tuzin.fm у сэзоне 2013/2014 (17 тураў, 1 лістапада 2013 — 27 чэрвеня 2014):

Akute — Наскрозь

Bigi — Муза

Дразды — Каханая дзяўчына

Dzieciuki — Песьня гарадзенскага гастарбайтэра

Дзьмітры Нікановіч — Ніколі

Geofil — Пан Падвей

Gleboki Smak — Шлях да майго дому

Gods Tower — Людзі на балоце

Bristol — Гэта магчыма

Паліна Рэспубліка — Лета