Re1ikt вярнуўся на родную зямлю (аўдыёпрэм’ера!)

Музыкі наважыліся выканаць па-свойму ў межах праекту «Re:Песьняры» песьню «Жураўлі на Палесьсе ляцяць».

«Жураўлі на Палесьсе ляцяць» — адна зь песень-візітовак «Песьняроў». Шырокую вядомасьць атрымала вэрсія ў выкананьні вакаліста Ігара Пені, што ўвайшла ў жывы альбом ансамблю «Зачараваная мая», выдадзены на касэтах і кружэлках (1982 і 1983 год адпаведна). Але напісаная яна была Ігарам Лучанком на словы паэта Алеся Ставера на пяць гадоў раней. Першым яе выканаўцам лічыцца Юры Дзянісаў, басіст і альтыст, які быў у складзе «Песьняроў» усяго толькі год. Дадатковай папулярнасьці песьні паспрыяла яшчэ тое, што практычна адначасова зь «Песьнярамі» яе ўзялі ў свой рэпэртуар «Сябры», а ў 2000 годзе N.R.M. апгрэйдзілі радок зь яе ў сваіх «Трох чарапахах». Менавіта гэты сьпеў вырашылі выканаць у праекце «Re:Песьняры» героі 2013 году па вэрсіі Tuzin.fm — гурт Re1ikt.

«Мэлёдыя з „Жураўлёў“ засталася ў памяці яшчэ з часоў юнацтва. Нягледзячы на тое, што ў пераходным узросьце я супрацьстаўляў сябе такім паняцьцям, як „эстрада“ і „поп-музыка“, гэтая моцная кампазыцыя здолела прыцягнуць увагу», — кажа вакаліст Уладзімер Казлоў.

Re1ikt абралі «Жураўлёў» па дзьвюх прычынах. «Па-першае, празь яе вясеньнюю атмасфэру, ад яе нібы патыхае цёплым пяшчотным паветрам і абуджэньнем. Па-другое, нам вельмі блізкая тэма твору — вяртаньне на родную зямлю пасьля доўгага растаньня», — тлумачыць Уладзімер. Дарэчы, першы склад гурта Re1ikt сабраўся ў Палесьсі — так зваўся мікрараён у Сьветлагорску, адкуль паходзіць гурт.

У сваёй вэрсіі музыкі зрабілі кампазыцыю больш ляканічнай, давялі яе настрой бліжэй да свайго фірмовага стылю. Таксама крыху зьмянілі вакальную партыю і вывялі на пярэдні план яскравую асноўную мэлёдыю песьні.

Re1ikt — Жураўлі на Палесьсе ляцяць (музыка Ігара Лучанка, словы Алеся Ставера, аранжыроўка 1981 году Ўладзімера Ткачэнкі, аранжыроўка 2014 году гурта Re1ikt). Зьмяшчаецца са згоды Ігара Лучанка.