Мары зьдзяйсьняюцца! Памідораў і Trubetskoy зрабілі рок-вэрсію «Цуду на Каляды» (прэм’ера!)

Знакамітая рэп-калядка ў новым прачытаньні адкрывае праект «Новае пакаленьне на Новы год».

Паводле задумы навагодняга праекту, дуэты мусілі складаць малады і сталы выканаўца. Памідораў і Trubetskoy гэтага правіла не парушылі, проста яны ўзялі на сябе адказнасьць як за папярэдняе, так і за новае пакаленьне і зрабілі рок-вэрсію гіта «Цуд на Каляды». Запісаная для праекту «Сьвяты вечар» у 1999-м, яна трывала ўвайшла ў лік самых пазнавальных беларускіх зімовых песень. «Нам гэта песьня заўсёды падабалася, нікому яшчэ не ўдавалася так арганічна чытаць „рагамафін“ на мове, як тое робіць Памідораў у гэтым трэку! А Памідораву ў сваю чаргу падабаецца музыка нашага гурта. Таму мы з радасьцю адгукнуліся на ідэю зрабіць яе сумесна», — распавядае вакаліст гурта Trubetskoy Павал Булатнікаў.

«Фармальна Trubetskoy у нашым дуэце выступае ў якасці маладога гурта, а я за сталага выканаўцу, хоць мы здаўна разам расьлі, вучыліся, бавілі час і выступалі на адных пляцоўках, — распавядае Аляксандар Памідораў. — Для мяне былі сапраўдным сьвятам гэтыя тры дні, якія мы правялі разам за працаю — два дні рэпэтыцыяў і адзін дзень запісу. І я вельмі ўдзячны Паўлу Булатнікаву, Руслану Ўладыку, Аляксандру Старажуку і Алесю-Францішку Мышкевічу за тую вэрсію песьні, якая была створаная. Яна разбурыла ўсталяваны ўжо канон, загучаўшы інакш, і я вельмі задаволены тым, як яна атрымалася».

Песьня «Цуд на Каляды» была запісаная ўжывую для праекту «Новае пакаленьне на Новы год». Відэавэрсію гэтага праекту можна будзе ўбачыць у ноч з 31 сьнежня 2015 на 1 студзеня 2016 году на тэлеканале «Белсат». А да гэтага на сайтах Tuzin.fm i Belsat.eu штодня вас чакае аўдыёпрэм’ера песень. Сьпяваем разам!

Trubetskoy і Аляксандар Памідораў — «Цуд на Каляды» (музыка і словы Аляксандра Памідорава)

Tuzin.fm/Белсат, фота Сяргея Балая

Гэта было аднойчы ўвечары, калі

Калолі зоркі зрок, ды ішоў сьнег па ўсёй Зямлі

І ціхі вецер разносіў песьні, што сьпявалі дзеці

Па ўсім сьвеце!

(ага-ага) Пляскаючы ў далоні.

Зіхцелі ліхтарыкі ў завейным палоне.

Чалавек адзінокі ў горад гэты прыйшоў.

Ён шукаў па сьвеце шчасьця, але покуль не знайшоў.

Стомлены, змораны, але верыў упарта

У тое, што будзе яму цуд

 На Каляды!

Сьвятая ноч у горадзе вялікім панавала,

Утаймоўвала думкі, сьнегам пасыпала.

У свайго вакна адна сядзела жанчына.

Чакала на цуд таксама, плюмбум варажыла.

Будзе-ня-будзе, калі-некалі, дай Божа!

А ў дзьверы грукае нехта — (ага) калядоўшчык!

Але ж нейкі дзіўны, да таго ж, адзін.

Таму і сенцы адчыніла, сказала: Сюды хадзі!

Сама не зразумеўшы, ці то прыбытак, ці то страта…

А можа, усё ж-ткі будзе ёй цуд

 На Каляды!

Калядная казка дарослым і дзецям!

Трубяцкі, Памідораў — Магістар Бібэндзі!

Дорым нанова, запрашаем у госьці!

Бавімся разам!

Дык вось

Завіруха сьціхла недзе за горадам белым

Ды ў адзінае вакно зоркі-волы глядзелі.

Ён стаў ейным падарункам, ён быў ейнае сьвята,

Ды й ня можа быть інакш на Каляды!

Хвала на вышынях! Спакой на Зямлі!

Анёлы на нябёсах сьпяваюць свае песьні!

Вясёлая навіна! Цуд адбыўся!

Гэта было ўжо ў Бэтлэеме — спраўдзілася ў Менску!

Дзьве тысячы год — іх будзе болей, дакладна!

Прыходзіць Сын Чалавечы, як Божы цуд

На Каляды!

Прыходзіць Сын Божы да чалавекаў кожны год

На Каляды!