Nizkiz. Ад цемры зарок (аўдыё)

Гурт Nizkiz прадстаўляе ў новым туры аўдыёчарту на Tuzin.fm сваю новую беларускамоўную песьню «Цемра».

«Цемра» мелася ўвайсьці ў альбом «Лірика», але практычна перад выданьнем дыску музыкі вырашылі яе выключыць з трэк-лісту і выдаць пасьля асобным сынглам. «Нам падалося, што яна надта ўжо выпінаецца сярод іншых песень ды агульнага кантэксту, таму падумалі, што варта яе прытрымаць», — тлумачыць вакаліст гурта Аляксандар Ільін, аўтар словаў і музыкі да песьні.

«Цемра» — чацьвертая беларускамоўная песьня гурта, і музыкі спадзяюцца, што яна паўторыць у чарце на Tuzin.fm посьпех трэкаў «Гуантанама» і «Цяпер і далей», якія неаднойчы ўваходзілі ў тройку лідэраў гіт-параду. «У гэтай кампазыцыі мы крыху паэкспэрымэнтавалі з драматургіяй. Там ёсьць новыя для нас фішкі, але з другога боку мы імкнуліся захаваць сваю пазнавальнасьць, таму атрымаўся такі сынтэз. І гэта нам падабаецца», — распавядае Аляксандар Ільін. Сачыць за навінамі гурта можна праз афіцыйную суполку.

Nizkiz — Цемра (музыка і словы Аляксандра Ільіна). Зьмяшчаецца са згоды выканаўцы.

Tuzin.fm

І я калісь стану маліць яе згубіць.

Разам з душой розум сышоў, толькі куды?

І не глядзець у яе бок,

Так назаўжды

Жыць.

Сьцены вакол, і я наконт яе пытаў — 

Хто ж яна ёсьць? Дабро ці зло?

Хто б адказаў.

Як падлічыць колькасьць ахвяр, і хто каго

Змог?

Цемра, ідзі

З раніцы ўздоўж,

Каб не сьляпіць

Болей ужо.

Холад туліў, і два крылы сыпалі сьнег.

Я ад такой сьцюжы дамоў — яна ўсьлед.

І адчуваць скураю, што і ў мяне ёсьць

Злосьць.

Памяць, спалі момант, калі ўсё пачалось.

Той успамін горкі, як дым, востры, як нож.

І падлічыць колькасьць ахвяр, і хто каго

Змог.

Цемра, ідзі

З раніцы ўздоўж,

Каб не сьляпіць

Болей ужо.

Стань для мяне,

Чуеш, стань для мяне

Новым сьвятлом,

Новым сэнсам далей.

Не варушыць

Гэта нельга цяпер.

З кожнай хвілінай

Цяжэй, і цяжэй, і цяжэй…

…І цяжэй…