Ганна Крамэр: «Кантры можа быць беларускім» (аўдыё)

Вакалістка гурта «Мерада» разам з музыкамі з гуртоў «J:морс» і «Эльдорадо» зрабіла жаночы варыянт гіта гурта «Бонда» пра Койданава ў кантры-стылістыцы. Песьня ўдзельнічае ў першым «Засьпявай-туры» на Tuzin.fm.

«На станцыі Койданава» — песьня гурта «Бонда», на якую ў 1989 годзе быў зьняты адзін зь першых беларускіх кліпаў. 30-гадовая сьпявачка Ганна Крамэр адкрыла для сябе гэтую песьню і гэтую каманду дзякуючы свайму мужу — Стыву Крамэру, які ў 80-я быў гукарэжысэрам гэтай каманды. «Для мяне „Бонда“ апынулася сапраўдным адкрыцьцём. І калі я вырашыла паўдзельнічаць у намінацыі „Беларускі кавэр“ у конкурсе „Засьпявай 3.0“, то ў мяне іншых варыянтаў не было. Захацелася зрабіць менавіта „Койданава“ — песьню з такім выразна брутальным тэкстам пра мужыкаў, якія разгружаюць машыны, пра электрычную зварку. Але зрабіць ейны жаночы варыянт, больш далікатны», — распавядае Ганна.

Адмыслова для гэтага запісу сабраўся новы праект, у які ўвайшлі гітарыст гурта «Мерада» Сяргей Бальцэвіч, басіст «J:морс» Валеры Дасюкевіч, скрыпач гурта «Эльдорадо» Віталь Хрушчоў, бубнач з «Эльдорадо» Дзьмітры Дзядзечка, а таксама ўдзельнік гомельскага гурта Place to Be Вадзім Міцько, які сыграў на губным гармоніку. Песьню вырашана было зрабіць ва ўлюбёным стылі Ганны Крамэр — кантры: «Гэтую музыку ўжывую я ўпершыню пачула ў 18 гадоў, калі была ў Ірляндыі. І літаральна закахалася ў яе. Мне здаецца, што гарманічна і мэлядычна яна вельмі падобная да беларускай музыкі — ёсьць у ёй тое, што кранае сэрца».

Новую вэрсію «Койданава» ўхвалілі як аўтар тэксту Адам Глёбус, так і сааўтар музыкі і яе першы выканаўца Ігар Варашкевіч. Ганна Крамэр кажа, што з задавальненьнем перасьпявала і некаторыя іншыя песьні «Бонды» — сярод яе ўлюбёных «Хлопец дурны», напрыклад.

Цяпер сьпявачка разам з Стывам Крамэрам рыхтуе да выданьня новы альбом «Мерады», а таксама кліп. Сачыць за навінамі ейнага гурта можна праз афіцыйную суполку.