Дыяна Громава: «Адкажы, чаму кожны фільм пра нас?» (аўдыё)

У чарце на Tuzin.fm Дыяна Громава прадстаўляе песьню «Адкажы». 19-гадовая сьпявачка пэўная, што гэты твор будзе блізкім для шматлікіх дзяўчат, бо ў ім вядзецца пра самыя важныя пачуцьці.

«Адкажы» — знакавая песьня для Дыяны Громавай. Яна пяе ды ўдзельнічае ў шматлікіх конкурсах і фэстах зь пяці гадоў, але дагэтуль ня мела ў рэпэртуары аўтарскага сьпеву па-беларуску. Гэты твор для яе напісаў Мікіта Найдзёнаў, лідэр гурта Hurma. Cьпявачцы ён прыйшоўся да душы і ад часу прэзэнтацыі песьні на Tuzin.fm займеў папулярнасьць сярод яе прыхільнікаў. «Мяркую, што гэтая песьня блізкая для шматлікіх дзяўчат, бо мы кахаем, разьвітваемся, гэта ж жыцьцё! Вельмі прыемна, што песьню слухаюць ня толькі беларусы. Як ні дзіўна, яна прыйшлася даспадобы ўкраінскім і расейскім слухачам», — распавядае Дыяна.

У свае 19 гадоў Дыяна Громава зьяўляецца ляўрэатам 13 міжнародных конкурсаў. Самая значная зь яе перамогаў — на фэсьце выканальніцкіх майстэрстваў у Галівудзе (2010), дзе яна была прызнаная найлепшай вакалісткай і атрымала прыз за найлепшую песьню. Пра свае далейшыя намеры ў творчасьці Дыяна пакуль не распаўсюджваецца: «Усе свае сакрэты раскрываць ня буду, але магу сказаць, што па хуткім часе пабачыце мяне на тэлеэкране». 

Дыяна Громава — Адкажы (музыка і словы Мікіты Найдзёнава). Зьмяшчаецца са згоды выканаўцы.

Tuzin.fm

Зноў твой плян рушыцца,

Да мяне з ружамі ідзеш

І мой спакой крадзеш.

Ты ўсё браў гульнямі,

Адкажы, скуль жа мы

З табой

Ляцелі над зямлёй.

Быў наш шлях пройдзены,

Што яшчэ знойдзем мы,

Калі

Далей адны пайшлі.

Як недарэчнасьці

Нашы сустрэчы ўсе

Я іх жадаю забыць.

Адкажы, чаму

Кожны фільм пра нас,

Дзе гісторыя заўжды бяз хэпі-энду.

Перажыць зіму,

Сэрца лечыць час.

Усё калісьці завяршаецца, ты ведаў.

Толькі не казаў.

Быў наш дзень сонечны,

мы з табой крочылі

далей,

шчасьлівыя, але

марам быць марамі,

неба зноў з хмарамі,

а ты,

ты думаў не аб тым.

Як недарэчнасьці

Нашы сустрэчы ўсе

Я іх жадаю забыць.

А ты не хвалюйся, каханьне хай самае першае

Забудзецца, нават, калі пасумую цяпер.

А ты не хвалюйся, яшчэ я знайду сабе лепшага,

Лепшага за цябе…