Надзея 2015. Intelligency пяе па-беларуску (аўдыёпрэм’ера)

Унікальны гурт зь Менску, што працуе ў жанры тэхна-блюзу, запісаў свой першы беларускамоўны EP пад назвай «Восень».

Tuzin.fm пісаў ужо пра арыгінальны праект Intelligency, які стварылі Ўсевалад Доўбня і Юры Тарасевіч. «Ніхто з нашых музыкаў ня робіць такі гук, ня піша такіх забаўных і адначасова трансавых малюнкаў з наўмысна разладжанай гітарай, прамой тлустай бочкай і зьлёгку нецьвярозым вакалам. Тым больш, ніхто не сумяшчае блюз і тэхна на тутэйшай глебе. Гэта новы фальклёр для жыхароў мэгаполісаў», — гэтак акрэсьліў іх стыль журналіст Віктар Сямашка. Пры канцы году хлопцы падрыхтавалі дэбютны беларускамоўны EP, рэліз якога адбыўся 26 сьнежня 2014 году. Песьню «Восень» яны прадстаўляюць у аўдыёчарце на Tuzin.fm.

«Пасыл гэтага твору ў тым, каб абудзіць пачуцьцё прыгажосьці да ўсіх праяваў прыроды — ад нараджэньня да схілу. Сэнс якраз у пачуцьці, у прыродзе дэкадансу. У глыбокай задуме заняпаду як такога, у рамантыцы восені», — так прадстаўляе свой новы твор Усевалад Доўбня.

На меркаваньне Tuzin.fm, праект Intelligency — адна з галоўных надзеяў беларускай незалежнай сцэны ў будучым 2015 годзе. Музыкі кажуць, што хочуць справіць зімовыя сьвяты ў спакойнай абстаноўцы ды ўзяцца за далейшую рэалізацыю сваіх творчых задумаў. У прыватнасьці праект будзе імкнуцца да выступаў на фэстах электроннай музыкі ў Беларусі і за мяжой.

Сачыць за навінамі гурта можна празь іх афіцыйную суполку.

Tuzin.fm

Intelligency — Восень (музыка — Усевалад Доўбня/Юры Тарасевіч, словы — Усевалад Доўбня). Зьмяшчаецца са згоды выканаўцы.

Забалела сонца i разышлiся яны ў гэту восень, гэту восень

У фантастычным выраі танцы да луны

Гэта можна. Гэта можна

У навакольным стане я стану як яна.

Гэта восень. Гэта восень

У фанатычным выраi: эмоцыя — сьцяна

Гэта можа, гэта можа