Вясновы гіт ад Вайцюшкевіча
У сэзоне 2004-2005 Зьміцер Вайцюшкевіч прадставіў у чарце на "Тузіне Гітоў" песьню "Вясновы дзень" на словы Рыгора Барадуліна.
Кампазыцыя "Вясновы дзень" трапіла ў лік найлепшых песень сэзону 2004-2005 па выніках галасаваньня. Яна была запісаная для дыску на вершы Рыгора Барадуліна "Паравоз каханьня", Народны паэт Беларусі блаславіў гэтую працу і начытаў свае вершы між песьнямі.
Вясновы дзень быў радасьцю даўгі,
Ды скарацеў, зрабіўшыся зімовым.
Цяпер даўжэе ноч маёй тугі,
Яна не падуладная замовам.
Я разумею ноч, а мне яна
Не паспрыяе, не паспагадае.
Тады было сьвятло, была вясна,
Цяпер азябла цемра галадае.
А ўсё таму, што Вас няма са мной.
А Вы былі калісьці ці ніколі?
Былі маёй зялёнаю вясной,
Вясёлаю бярэзінаю ў полі.
Як той бяздушны вецер, я п'янеў,
I быў зялёны я ў сваім наіве.
Выў добры першы гром і першы гнеў,
I першы сьлед на некранутай ніве.
Штоноч даўжэе ноч маёй тугі,
Радзей вясновае сьвітаньне сніцца.
Зьвіняць майго адчаю ланцугі.
Самота — беспрасьветная цямніца
ЧЫТАЙЦЕ ТАКСАМА:
КАМЕНТАВАЦЬ