Беларускія артысты аб’ядналіся ў адной песні

Наста Шпакоўская, Naka:

— Песня пісалася лёгка, на адным дыханні, бо словы Уладзіміра Някляева цяпер блізкія кожнаму беларусу. Я ад усяго сэрца ўдзячная ўсім неабыякавым, з кім разам стваралася гэтая песня.

Дзяніс Тарасенка, «Разбітае Сэрца Пацана»:

— Песня атрымалася шчырай, сумленнай і па-сапраўднаму пра набалелае. Бо чалавечае нягодніцтва нельга апраўдаць ні службай, ні абставінамі, ні загадамі. Толькі маральны выбар характарызуе чалавека. У нашай сённяшняй сітуацыі гэты выбар актуальны, як ніколі, і кожны чалавек у адказе за свой выбар.  

Ілля Чарапко, «Петля Пристрастия»: 

— Было б дзіўна не выказацца нейкім чынам, не паказаць сваё стаўленне да таго, што адбываецца, асабліва ў момант, калі кансалідацыя грамадства неабходная як ніколі. Уласна, песня гэтая і з'яўляецца дэманстрацыяй таго, што ў дадзены момант людзі, якія маюць дачыненне да творчасці, выступаюць адзіным фронтам. 

Аляксандр Дзянісаў, Dzieciuki:

— Мне адразу ўсё спадабалася і я адразу ж пагадзіўся, таму што песня вельмі добрая. Ці зрабіў я нешта, каб яна стала лепш — хай ацэньваюць слухачы.

Віктар Рудэнка, Rostany:

— Мне вельмі пашанцавала з някляеўскімі радкамі, якія я выконваю ў песні. Яны цалкам пра мяне, да літары. Сапраўды, «каб не здохнуць» прадаваў вершы, а яшчэ назіраў, як прадаецца тое, што прадавацца не павінна. І ў цэлым усё акурат пра скрадзеныя 26 гадоў майго жыцця, у якім я планаваў быць значна больш адважным артыстам, значна больш амбіцыйным і карысным грамадзянінам маёй Беларусі.

Таксама на песню «Вам» ёсць відэа, якое зняў і змантаваў Аляксандр Духан.