Містычны кліп без цэнзуры ад The Superboyz (прэм’ера)

Гурт, у які ўвайшлі ўдзельнікі «Крамбамбулі», «J:Морс», «Лепрыконсаў» і Trubetskoy, прадстаўляе на Tuzin.fm нецэнзураваную вэрсію свайго новага купальскага кліпу «Маці».

Аўтарам сцэнару і рэжысэрам роліку стаў Руслан Старыкоўскі, прадусар The Superboyz. Ён распавядае, што відэа здымалі ля хаты свайго сябры, у вёсцы Седлішча, што ў Валожынскім раёне: «Там стаіць хата, якой з паўтара стагодзьдзя, а побач лясное возера. Закарцела зрабіць кліп самому, бо цяжка перанесьці сюжэт з сваёй галавы ў галаву іншага рэжысэра. Але апэратары і мантажысты — профі, так што за вынік мы не хваляваліся», — кажа Руслан.

Паводле сюжэту, браты галоўнага героя, ролю якога выканаў вакаліст The Superboyz Алесь-Францішак Мышкевіч, па чарзе гінуць у купалаўскую ноч. Той з гора напіваецца на хаўтурах ды ідзе высьвятляць адносіны з каварнымі русалкамі, якія завабілі ягоных братоў. У кліпе таксама зьняўся паралімпійскі спартовец, чэмпіён сьвету і Эўропы па лёгкай атлетыцы Аляксандар Субота, які сыграў ролю аднаго з братоў героя, ды ўдзельнікі The Superboyz, якія граюць таксама ў такіх гуртах, як «Крамбамбуля», «J:Морс», «Лепрыконсы» і Trubetskoy.

Сачыць за навінамі новага гурта можна праз афіцыйныя суполкі УК і FB.

The Superboyz — Маці (вэрсія без цэнзуры, рэжысэр Руслан Старыкоўскі).

Tuzin.fm