Re1ikt лечыць. Пераадолець стрэс за 4 хвіліны (аўдыё)

Гурт Re1ikt прадстаўляе ў аўдыёчарце на Tuzin.fm «Люцэрну» — бадай што самы магічны трэк з альбому «Лекавыя травы». Пра гісторыю яго напісаньня распавядае аўтар Алесь Дземідзенка.

Я хацеў напісаць такую песьню, гукі якой, маглі б супакойваць чалавека, каб дапамагалі пераадолець стрэс, хваляваньні. Люцэрна — гэта каганец, маленькі ліхтарык у цемры, а таксама лекавая расьліна — ёй лечаць розныя хваробы, ці проста падмацоўваюць арганізм.

Першыя накіды на музыку былі створаны яшчэ ў 2011 годзе, але працяг адбыўся толькі ў 2014-м. Тэкст напісаны ўзімку гэтага ж году. Па лютым марозе я ехаў да нашага вакаліста Ўладзя Казлова і па дарозе дадумваў радкі, а як прыйшоў то высьвятліў, што не памятаю нумар яго кватэры і тэлефон сеў. Дзякуй богу, што кватэра на першым паверсе — я абышоў кругом будынак і пачаў грукаць у шыбы балькону. Спужаў толькі Ўладзя і яго жонку. Добра падмерз увогуле, але калі трапіў на цёплую кухню з смачнай гарбатай, то добра атрымалася прэзэнтаваць Вову першы куплет. Адышоў ад марозу і сьпеў з душою.

Re1ikt — Люцэрна (музыка і словы Алеся Дземідзенкі). Зьмяшчаецца са згоды выканаўцы.

Алесь Дземідзенка, для Tuzin.fm

Ты бачыш сьвет не такім, як іншыя

Чуеш колераў гук

Хай не парушыць спакой і цішу

Сусьвету вонкавы грук.

Прыйдзе час і старое лісьце

Ссыпле самое сябе.

Пачварына пастку расьцісьне

І адпусьціць цябе.

Станеш ты

Зоркай з самых глыбокіх сноў

Станеш ты

Возерам з самых далёкіх краёў

Было так, што пражыты час

Разьдіраў ды шкодзіў.

Магло адбыцца і ў мінулы раз,

Але я не сыходзіў.

Станеш ты

Зоркай з самых глыбокіх сноў

Станеш ты

Возерам з самых далёкіх краёў

Пакуты больш не пагражаюць

Дома не сядзі

Абалонка трэснула —

ў сьвет выходзь, ідзі