Dzieciuki & Міхась Чарот. Пабудзіць балота гучным шумам (прэм’ера!)

Гурт Dzieciuki запісаў для праекту парталу TuzinFM «(Не)расстраляная паэзія» песьню на верш Міхася Чарота «Бунтар».

Міхась Чарот — той самы аўтар «Купалінкі», якая доўгі час лічылася народнай. Настаўнік паводле адукацыі, актор трупы Галубка, артыст хору Тэраўскага, удзельнік антыпольскага падпольля і арганізатар паўстанцкіх атрадаў падчас Грамадзянскай вайны і інтэрвэнцыі. Ён быў адным са стваральнікаў «Маладняка» і ўладальнікам самага першага пасьведчаньня аб’яднаньня. Менавіта па ягонай аповесьці «Сьвінапас» быў зьняты фільм «Лясная быль», які прэтэндуе на званьне першай беларускай стужкі. Свой апошні верш «Прысяга» ён выдрапаў у камэры «амэрыканкі» перад расстрэлам у 1937-м… Падрабязьней пра гэтую надзвычай цікавую асобу распавяла дасьледчыца Ганна Севярынец у межах адкрытай лекцыі праекту «(Не)расстраляная паэзія» 20 кастрычніка ў кнігарні «Логвінаў».

Верш «Бунтар» — безумоўна ёсьць візытоўкаю Чарота. Радкі «Я шумлівы чарот, я мяцежны бунтар//Я балота буджу гучным шумам» выдатна падышлі пад эстэтыку гарадзенскай фольк-панкавай фармацыі Dzieciuki. Музыкі зь вялікай цікавасьцю паставіліся да праекту. «Як тут не лічыць праект важным, калі цэлы пласт інтэлігенцыі закапалі ў зямлю? — кажа вакаліст каманды Алесь Дзянісаў. — Пра гэта трэба казаць. І сьпяваць. Усё што засталося ад паэтаў — іх творы. Шмат што было зьнішчана, але і шмат засталося. Выдатны праект, бо дае магчымасьць загінуўшым паэтам зьвярнуцца да нашчадкаў»…

Музыкі сыходзілі з таго, што такі бунтарскі верш-крык чалавека неабыякавага, якому баліць, мусіць быць вырашаны ў адпаведным баявым настроі. Таму атрымалася мажорная песьня, якую напісаў гітарыст каманды Андрэй Пудзін, а канчатковую аранжыроўку зрабілі ўсе разам. «Не магу сказаць, што лёгка працавалася. Штосьці зьмянялі, нейкія кавалкі выкідалі, затое, запісаліся даволі хутка!» — кажа Алесь.