Лукашэнка пра забароненых музыкаў: «Бывае, адмарожаныя дзесьці нахамілі» (аўдыё)

Аляксандар Лукашэнка адказаў на пытаньне адносна «чорных сьпісаў» забароненых музыкаў.

Пытаньне падчас інтэрвію Лукашэнкі недзяржаўным СМІ на гэты конт задаў журналіст «Еўрарадыё» Зьміцер Лукашук, аўтар песень гурта «Крама». Ён пацікавіўся, ці можна аслабіць ціск на рок-музыкаў і наогул надаць званьні народных артыстаў такім асобам, як Лявон Вольскі, Зьміцер Вайцюшкевіч і Ігар Варашкевіч.

«Шчыра кажучы, ня ведаю, зь якога боку падысьці да гэтага, — сказаў Лукашэнка. — Можа, сапраўды кагосьці негалосна кудысьці не пускаюць. Можа, яны дзесьці і накасячылі. Можа, ня час і ня месца так да іх падыходзіць, можа, яны зьменяць сваю пазыцыю, калі яна няправільная. Мне міністар культуры казаў, што няма ў нас сьпісаў. Але бывае, што адмарожаныя дзесьці нахамілі, супраць дзяржавы. Можа давайце Давыдзьку даручым, каб ён даў ім слова ў нейкім фармаце на тэлебачаньні» (цытуецца паводле «Еўрарадыё»).

Незалежныя рок-музыкі ў Беларусі пастаянна сутыкаюцца з забаронамі і зрывамі канцэртаў, іх песьні знаходзяцца пад забаронай у прадзяржаўных СМІ, але на афіцыйным узроўні гэты факт не прызнаецца.

На фота: Аляксандар Лукашэнка цісьне руку Зьмітру Лукашуку падчас сустрэчы ў Палацы незалежнасьці, 4 жніўня 2015, фота БелТА

Яшчэ: Ідэолягі афіцыйна зьвінавацілі Вайцюшкевіча ў экстрымізьме (дакумэнт)

Tuzin.fm