
Распачаўся прыём заявак на конкурс «Басовішча-2017»
Заяўкі на конкурс маладых гуртоў у межах XXVIII фэстывалю музыкі маладой Беларусі «Басовішча-2017» прымаюцца да 27 красавіка.
Да ўдзелу запрашаюцца маладыя выканаўцы і гурты, асноўную частку рэпэртуару якіх складаюць беларускамоўныя кампазыцыі. Музыкі ня могуць мець больш за два выдадзеныя альбомы, а сярэдні ўзрост удзельнікаў не мусіць перавышаць 30 гадоў.
Сёлета конкурс пройдзе у тры этапы. Першы — інтэрнэт-адбор — працягнецца да 27 красавіка. Каб падаць заяўку, неабходна запоўніць форму. Па заканчэньні інтэрнэт-адбору будзе вызначана 10 гуртоў-паўфіналістаў. Яны возьмуць удзел у другім этапе конкурсу — канцэртным праслухоўваньні «Адборышча», якое пройдзе 20 траўня ў Менску пры падтрымцы вядомага беларускага гурта, імя якога пакуль трымаецца ў сакрэце. Па выніках «Адборышча» будуць названыя чатыры гурты, якія атрымаюць магчымасьць прэзэнтаваць сваю праграму на сцэне «Басовішча» ў першы фэстывальны дзень, 14 ліпеня, ды паўдзельнічаць у змаганьні за галоўны прыз — грашовую ўзнагароду, магчымасьць выступіць у другі дзень фэстывалю, гарантаванае месца ў праграме «Басовішча-2018» ды ратацыю сваіх песень ў этэры «Беларускага Радыё Рацыя».
Найлепшых вызначыць журы, куды ўвойдзуць прадстаўнікі арганізатараў зь Беларускага аб’яднаньня студэнтаў, музыкі, культурныя дзеячы і музычныя журналісты.
Сачыць за навінамі фэстывалю можна праз афіцыйную суполку ў Facebook.
КАМЕНТАВАЦЬ