Дзмітрый Строцаў: На галаву надзелі мяшок і адвезлі ў КДБ

Паэт Дзмітрый Строцаў адбыў 13 сутак зняволення ў жодзінскай турме.

Па вызваленні творца падзяліўся з «Нашай Нівай» уражаннямі ад арышту:

Я ішоў дадому з «Беларусбанка», але за некалькі крокаў ад пад’езда мне надзелі на галаву мяшок, пагрузілі ў мікрааўтобус і, як я потым зразумеў, адвезлі ў КДБ на Камсамольскую.

 

У КДБ мы знаходзіліся гадзіны паўтары, знаёміліся, як мне здаецца. Я адмаўляўся ад усяго, але ў мяне не быў заблакаваны тэлефон, і там яны знайшлі мноства дадатковых матэрыялаў, якія маглі неяк падставіць іншых людзей. Таму я пагадзіўся на той эпізод, дзе быў адзін. Падпісаў пратакол, што згодны. Пасля гэтага мяне прывезлі ў Цэнтральны РУУС.

 

Пры затрыманні не білі, нават калі змясцілі ў мікрааўтобус, надзелі мяшок і кайданкі, то ветліва спыталі: «Як сэрца?». Я ім нічога не адказваў да таго моманта, як не знялі мяшок і не адвялі ў кабінет следчага. Першае, што я сказаў — я вам не давяраю, вы мяне скралі.

 

Следчы прадставіўся не супрацоўнікам КДБ, а міліцыянерам, яму я прапаноўваў пераходзіць на бок народа, бо «вашы дні злічаныя». Калі мяне выводзілі, то я зразумеў, што гэта КДБ, мне кепска надзелі мяшок, я ўсё бачыў.

 

Я даў шмат інфанагодаў, занадта шмат і свабодна публікаваў матэрыялаў на фэйсбуку. 

паводле nashaniva.by