Rokash у адборы на «Эўравізію»: «Мэлёдыка мовы мае скарыць»

Гурт, што працуе ў стылістыцы нэафольку, вырашыў узяць удзел у нацыянальным адборы на «Эўравізію-2015».

Музыкі падалі заяву на конкурс зь песьняй «Лойма». Яна мае містычнае гучаньне, шчодра прыпраўленае рокавым драйвам. У ёй музыкі зьвяртаюцца да беларускай міталёгіі. Лойма — лясны дух, які зьяўляецца ў гушчары перад вандроўнікам у вобразе прывабнай дзяўчыны, чарамі прымушае ў сябе закахацца, але пасьля раптоўна зьнікае, прымушаючы хлопца ўсе жыцьцё пакутваць. Музыкі пэўныя, што менавіта беларускамоўная песьня павінна гучаць у «Эўравізіі» ад беларускага канкурсанта. «Мэлёдыка нашай роднай мовы, яе мілагучнасьць ды непаўторнасьць здольныя скарыць сэрцы эўрапейскіх слухачоў. Беларуская мова, лірычны жаночы вакал, таямнічы флёр беларускай мінуўшчыны і шчырая рокавая жывая падача — гэта тое, на што мы спадзяемся, прымаючы ўдзел у адборы на конкурс», — кажа ўдзельнік каманды Лявон Казакоў.

Усяго на конкурс, які налета пройдзе ў Вене, пададзена больш за сотню заяваў. Праслухоўваньне прэтэндэнтаў адбудзецца 4 і 5 сьнежня, а фінальны канцэрт заплянаваны на 26 сьнежня. У канкурсантах — звыклы набор малазначных поп-артыстаў. Сярод фаварытаў сёлетняга адбору — дзявочы гурт пад кіраўніцтвам Аляксандра Рыбака «Mіlkі», сьпявак Юзары, Віталь Варанко ды сталая ўдзельніца адбораў Гюнэш.

Яшчэ: Rokash прэзэнтуе EP «Пад знакам крумкача» з нагоды 10-годзьдзя (аўдыёпрэм’ера)

Tuzin.fm