На дыску рарытэтаў ад «J:морс» будзе тры песьні па-беларуску

Адна зь іх — «Фотаздымкі» — і дала назву складанцы, якая будзе выдадена адным асобнікам.

Складанка рарытэтаў «Фотаздымкі 2003—2014» выдаецца дзеля высокароднай мэты — дапамагчы хвораму дзіцёнку, 6-гадоваму Стасу Кірылаву. Ён нарадзіўся са шматлікімі паталогіямі, праз паўгоду зь сям’і сыйшоў бацька, таму цяпер яго і старэйшага брата гадуе маці. Дыск выдадзены ў адзіным экзэмпляры, які прададуць праз аўкцыён. У першы дзень таргоў стаўка дасягнула ўжо 3 525 000 рублёў. Аукцыён працягнецца да раніцы 12 чэрвеня.

На дыск трапілі нявыдадзеныя песні, нечаканыя вэрсіі вядомых кампазыцыяў і рэдкія неальбомныя запісы. Сярод іх песьня «Фотаздымкі» аўтарства Рамана Арлова, запісаная для альбому «Босиком по мостовой» (2006). У той альбом яна ня трапіла і наогул лічылася страчанай і толькі нядаўна знайшлася ў архівах Уладзімера Пугача. Зь беларускіх песень на дыск патрапілі таксама рарытэт «Піва», якая не выдавалася на альбомах «J:морс», а таксама невядомая вэрсія кампазыцыі «Адліга».

Пугач зазначае, што пераможца аўкцыёну сам вырашыць, ці выкладаць гэты матэрыял у сеціва. Іншых дыскаў з гэтай складанкай у продажы ня будзе.

Tuzin.fm